1992 онд “Мариагийн Цэвэр Ариун Зүрх” (C.I.C.M.) бүлгэмийн миссионерууд эцэг Венсеслао Падилла, эцэг Роберт Госсенс, эцэг Гилберт Сэйлс нар Монгол улсад хүрэлцэн ирснээр Монгол дахь Католик шашны үндэс суурь тавигдсан түүхтэй. Хожим нь анхны гурван миссионерын нэг болох Венсеслао Падилла Монгол дахь Католик шашны анхны хамбаар томилогдсон билээ. Цаг хугацааны явцад шинэ миссионерууд нэмэгдэн ирж Монгол дахь Католик шашны үйл ажиллагааг идэвхжүүлж, хөгжил цэцэглэлтийн замд чухал хувь нэмэр оруулсаар ирсэн. Эдгээр бүлгэмүүд улс орон даяар нийгэм, боловсрол ба итгэл үнэмшилд суурилсан өргөн хүрээний олон санаачилгаараа дамжуулан үйлчилж байна. Тэд хамгийн эмзэг бүлгийнхэнд түшиг болох, гэр бүлийн үнэ цэнийг хамгаалах болон олон нийтийг чадавхжуулахад эн тэргүүнд анхаарч Католик шашны үнэт зүйлс Монголын нийгэмд зөв зохистой танигдаж, өөрийн жамаар цэцэглэн хөгжих бат бөх суурийг бүрдүүлэхэд тусалж байна.